മട്ടന്നൂരിൽ സ്വച്ഛോത്സവം:

മട്ടന്നൂരിൽ സ്വച്ഛോത്സവം: വിദ്യാർത്ഥികളുടെ നേതൃത്വത്തിൽ പ്ലോഗ് റണ്ണും ശുചീകരണവും
മട്ടന്നൂർ: മട്ടന്നൂർ നഗരസഭയുടെ സ്വച്ഛോത്സവം ക്യാമ്പയിനിന്റെ ഭാഗമായി നഗരത്തിൽ പ്ലോഗ് റണ്ണും (Plog Run) ശുചീകരണ പ്രവർത്തനവും സംഘടിപ്പിച്ചു. മട്ടന്നൂർ ഹയർ സെക്കൻഡറി സ്കൂളിലെയും ഗവ. പോളിടെക്നിക് കോളേജിലെയും എൻ.എസ്.എസ്. വളണ്ടിയർമാരാണ് പരിപാടിക്ക് നേതൃത്വം നൽകിയത്.

രാവിലെ 9 മണിക്ക് മട്ടന്നൂർ ബസ് സ്റ്റാൻഡ് പരിസരത്ത് നഗരസഭാ ചെയർപേഴ്സൺ ശ്രീ. എൻ. ഷാജിത്ത് മാസ്റ്റർ പ്ലോഗ് റൺ ഫ്ലാഗ് ഓഫ് ചെയ്ത് ഉദ്ഘാടനം നിർവഹിച്ചു. ആരോഗ്യ സ്റ്റാൻഡിംഗ് കമ്മിറ്റി ചെയർമാൻ ശ്രീ. കെ. മജീദ് അധ്യക്ഷത വഹിച്ചു. നാടിനെ മാലിന്യമുക്തമാക്കുന്നതിൽ യുവജനങ്ങളുടെ പങ്ക് വലുതാണെന്ന് ഉദ്ഘാടന പ്രസംഗത്തിൽ ചെയർമാൻ പറഞ്ഞു.

നഗരസഭാ കൗൺസിലർമാരായ ശ്രീ. ജലീൽ പി.പി, ശ്രീ. മുഹമ്മദ് വി.എൻ, ശ്രീ. സുഗതൻ വി.കെ, ശ്രീമതി പ്രമിജ, ശ്രീമതി നിഷ എന്നിവർ ആശംസകൾ അർപ്പിച്ചു. തുടർന്ന്, ഹരിത കേരള മിഷൻ റിസോഴ്സ് പേഴ്സൺ ശ്രീ. ജയപ്രകാശ് പന്തക്കൽ മാലിന്യ സംസ്കരണത്തെയും ശുചിത്വത്തിന്റെ പ്രാധാന്യത്തെയും കുറിച്ച് വിദ്യാർത്ഥികൾക്കായി ക്ലാസ് എടുത്തു.

ബസ് സ്റ്റാൻഡിൽ നിന്ന് ആരംഭിച്ച് കളറോഡ് വരെ നീണ്ട പ്ലോഗ് റണ്ണിൽ പങ്കെടുത്ത വിദ്യാർത്ഥികൾ റോഡിനിരുവശവും ഉപേക്ഷിക്കപ്പെട്ട പ്ലാസ്റ്റിക് ഉൾപ്പെടെയുള്ള മാലിന്യങ്ങൾ ശേഖരിച്ചു.

ക്ലീൻ സിറ്റി മാനേജർ കെ.കെ. കുഞ്ഞിരാമൻ ചടങ്ങിന് സ്വാഗതം ആശംസിച്ചു. ഹെൽത്ത് ഇൻസ്പെക്ടർ യു.കെ. സനൽ കുമാർ നന്ദി രേഖപ്പെടുത്തി. പബ്ലിക്ക് ഹെൽത്ത് ഇൻസ്പെക്ടർമാരായ പ്രസാദ് കെ.എം, ജിൻസ്, രസ്ന, ശുചിത്വ മിഷൻ വൈ.പി. നന്ദിത, കെ.എസ്.ഡബ്ല്യു.എം.പി. എഞ്ചിനീയർ ഷിജോവ്, എൻ.എസ്.എസ്. പ്രോഗ്രാം ഓഫീസർ രൂപ എന്നിവർ പരിപാടികൾക്ക് നേതൃത്വം നൽകി.